வாங்க சாப்பிடலாம் புதுமையான பக்கோடா

பக்கோடா  சாப்பிட எல்லோருக்கும் புடிக்கும்.

சும்மா கொரிக்கலாம்
டீயுடன் ருசிக்கலாம்
சாப்பாட்டுக்கு தொட்டுக் கொள்ளலாம்
என செளகரியமான ஒன்று  இது.








பாவக்காயை எடுத்தேன்...மனசு ஏன் இதை பக்கோடா போடக்கூடாதுன்னு கேட்டது...?

குழம்பு வைச்சாச்சு, சிப்ஸ் 2 வகை பண்ணியாச்சு...இதெல்லாம் பதிவா பின்னாடி வரும்.

புதுசா என்ன பண்ணலாம்ன்னு யோசிச்சப்ப....வந்த ஐடியா...இது. சரின்னு களத்துல குதித்தேன். சும்மா சொல்லக்கூடாது சூப்பரா இருந்தது. வித்தியாசமாகவும் இருந்தது. அதாங்க இப்ப உங்க கிட்ட பதிவா வந்து விட்டது எல்லாவற்றையும் முந்திக் கொண்டு...அவசரக்குடுக்கை....


தேவையான பொருட்கள்

பாவக்காய் - 1/2 கோப்பை
வெங்காயம் - 1 கோப்பை
முந்திரி - 5
கொத்தமல்லி - 1 கை
உப்பு - ருசிக்கு
மிளகாய் தூள் - 1 தே.க
கடலைமாவு - 3 மே.க
அரிசிமாவு - 2 தே.க
பெருங்காயம் - சிறிது


கரைசல் 

புளி - சிறிய நெல்லி
உப்பு - சிறிது
மஞ்சள் தூள் - சிறிது

இவற்றை கரைசலாக்கிக் கொள்ளுங்கள்.


பாவக்காயை சிப்ஸ்க்கு நறுக்குவது மாதிரி மெல்லிய வட்டமாக நறுக்கிக் கொண்டு அதை 4 பாகமாக ஆக்கிக் கொள்ளுங்கள். பின் கரைசலில் போட்டு 15 அ 20 நிமிடங்கள் ஊறவிடவும். பின் பிழிந்து எடுத்துக் கொள்ளுங்கள். இப்படி செய்வதால் பாவக்காயின் கசப்பு சற்று குறைந்து விடும். உப்பும் சார்ந்து இருக்கும்.

வெங்காயத்தை சற்று பெரியதாக  நறுக்கிக் கொள்ளுங்கள்

முந்திரியை நான்கு நான்காக உடைத்துக் கொள்ளுங்கள்.

கொத்தமல்லியை நறுக்கிக் கொள்ளுங்கள்.


பொடி + நறுக்கிய வற்றை சேர்த்து கலக்குங்கள். உப்பு சிறிது சேருங்கள். தண்ணீர் தெளித்துக் கொண்டு பிசறுங்கள்.

எண்ணெயில் பொரித்து எடுக்கவும்.